फतेहपुर उपचुनाव: हुन परमार होरां न, खरे च न बुरे च, पढ़ा तुड़का राम क्या गलांदे
Fatehpur By Election चाचैं गलाया जे फतेहपुरे च 2017 दे चुनाव होए तां प्रधानमंत्री नरेन्द्र मोदी होरां दी रैली भी होई। तिन्हां किल्हे पठाणिए अमर शहीद वजीर राम सिंह पठानिया होरां जो भी याद कित्ता। अजकल फतेहपुरे दी गल लगदी तां पठाणिए कने ठाकुर ही याद ओंदे।
फतेहपुर, जेएनएन। Fatehpur By Election, चाचैं गलाया जे फतेहपुरे च 2017 दे चुनाव होए तां प्रधानमंत्री नरेन्द्र मोदी होरां दी रैली भी होई। तिन्हां किल्हे पठाणिए अमर शहीद वजीर राम सिंह पठानिया होरां जो भी याद कित्ता। अजकल फतेहपुरे दी गल लगदी तां पठाणिए कने ठाकुर ही याद ओंदे। भारतीय जनता पार्टी दा दारोमदार ठाकर कने पठाणिया ही सम्हाला करदे। इक ठाकर है, इक पठाणिया। गल्ल यह है भई दोह्यो ही इसते पैहले भी चुनाव दी जिम्मेदारी सम्हाली चुक्कयो। सैह चुनाव नगर निगम दे थे। इक पलमां च कने दूआ धर्मदासे दिया धर्मशाला च। लग्गै ईह्यां जे धर्मशाला दा कुआल बड़ा चढ़ाइया आला था। कने पालमपरे दे पलम पधरे। इक्की अपणे लाक्के च रातीं लगाइयां कने दूसरे इक अद्धी रात कटी हुंगी।
रजल्ट जे निकलया तां पालमपुरे च हत्थ चमकेया कने धर्मशाला किछ छक्का-पंजा करी ने कमले दा फुल्ल पलने ते बची गेया। हण भाजपा दे लोक पुच्छा दे भई फतेहपुरे च तां प्रभारी होरां जो रातीं लाणा पोणियां। ठाकर बोलदे जे सीट असां दी। पठाणिए बोलदे जे सीट तां असां दी है अपर पठाणिए ड्रैवर कैंह नी लाए। परांह ते परमार होरां फतेहपुरे दिया गर्मियां ते झूटा लेई करी जुब्बल जाई रैह कने हुण वापसी होआ दी। गला दे जे पार्टिया दा गलाणा सिर मत्थैं अपर परनाला ओथे दा ओथे। मतलब एह भई पार्टी ठीक है, कैंडीडेट दी मदद नी करी होणी।
इसदा मतलब एह भी है भई परमार होरां लेक्सने च ओणा ही नी। भाजपा जो लग्गा दा ज सैह भी बुरी गल नी। जे परमार साथ नी दिह्ंगे तां बरोध भी नी करगे। मतलब एह जे, न खरे च, न बुरे च। परांह भवानी सिंह भी खरी भली नौकरी छड्डी करी राजनीतिया च आई बैठे। हण हत्थां जोडऩे दी बारी आई गेई। दिखणा एह है भई बलदेबे दा बल चलणा कि भवानिए दी ताकत।